PREGÓN de DEGAÑA 24 de julio de 2022 (Naciu ‘i Riguilón)

 

Bonas tardes Degaña. Degañeses ya degañesas.

Ía pa mí un gran placer tar güei aiquí ya poder abrir las fiestas de Santiago d’este añu 2022.

 Muitas gracias a los mozos de la comisión de Fiestas por dame la oportunidá de poder acompañavos nun día cumo este.

You, con ser de Cangas, miou padre foi de Rengos ya mia madre de Mual, onde nací, empecéi a cunecer Degaña nos anos 90 cuando viene a faer el catastro, ya foi, podríamos decilo asina, un amor a primera vista.

Pa mí, que siempre me gustóu la etnografía, el fulklor ya la cultura tradicional, Degaña yera la última frontera. Una zona que mantuvo viva la arquitectura tradicional, las costumbres ya’l habla durante más tiempu qu’outras zonas mechor comunicadas.

D’aquetsa cunocí ya a muita xente: a Dulia, La Rabica, a Manolín de Capellán, a Ginés, a Paco ya Pepe de Martín, conos que cheguéi a tener una estreita relación, ya visitaba siempre que pasaba por Degaña.

Espuéis, nel añu 2006  l’Ayuntamientu Degaña encargóunos, a mí ya la mia mucher, Mª Dolores, un estudiu sobre los Valores Culturales del Concechu, ya foi aquí cuando, durante un añu, epicipiamos a cunecer Degaña de verdá.

Los testos deste trabachu fonon los que después sirvienon de base pa la edición del tsibru de Degaña. El secreto mejor guardado de Asturias

Gracias Garet, Vega ya Belarmino por confiar en nosoutros ya poder desarrollar un proyeutu tan guapu.

Ya sí: Degaña engaña, porque nun ía lu mismu venir de visita o cruzar en coche este precioso vatse, camín de Cangas, Ibias, Tsaciana ou Furnietsa, qu’andalo aspaciu en bona compañía ya descubrir los rincones tan guapos qu’aiquí hai: La Medal, La Veiga, Los Castros, Las tsagunas de Tsagunachos ya Fasguéu, La cueva de Fontsada, ou las viechas brañas vaqueiras de Los Cutsaos ya Navaliegos.

Ya hora you digo: Degaña engancha, ou polo menos a mí enganchóume, ya enganchóume bien; polos sous paisajes, pola sua etnografía, pol sou fulklor. Pero sobre tou pola sua xente. Ya a Degaña vuelvo siempre que puedo, ou por Degaña paso camín de Cangas cuando voi vé la familia.

You cunucí las últimas casas ya urios de teitu del pueblu, cunucí a Luisinda ya Dulia la Rabica, grandes contadoras d’hestorias ya tradiciones.

Aiquí cunucí dalgunas de las tsariegas más guapa que vi, cumu la de casa Tanón ou la de casa Miguel.

Ya cunecí tamién a míticos danzantes cumu Manolín de Capellán, Cané, ou a Manuel Álvarez, el Cubanu, principales informantes de la Danza de Degaña que tuve, pal tsibru que tou faiedo sobre las Danzas de la zona.

A Ginés García Gavela, Alcalde de Degaña nos años 50/60 que m’abríu de par en par sua casa ya’l sou excepcional archivu fotográficu. Ya la sua mucher Felicita, gran persona ya escelente contadora de cuentos tradicionales.

Con Benina Fernández, de Pedro, faléi tsargas horas, de la vida, de fulklor ya tradiciones, na terraza de casa, con Marina de Calamín ya Mari de Tanón, que nos ayudanon tamién muitu na elaboración del Tsibru de Degaña.

En Degaña viví tamién una de las experiencias que más me marcóu na vida, cuando despuéis d’una estupenda tarde de música ya canciones nel bar de Marinía n’A Estierna tuviemos un acidente de coche baxando del Altu’l Capillu, antes de chegar al Rebotsal, onde desgraciadamente muríu el tamburiteiru Franciscu Filipón de La Vilietsa, que venía cun nós. Desde ese triste suceso decidí estudiar a fondo el tema de la Danza, ya reivindicar ya poner en valor la figura de Francisco, cumo tamboriteiru, ya persona de profundas convicciones. Vaya güei pa él el nuesu recuerdu ya reconocimiento.

Pero sobre tou nu concechu Degaña viví grandes ya inolvidables momentos:

Viví de primera manu la recuperación de la Danza de Trabáu en 1995.

Ya tovía güei m’acuerdu de la alegría que tuve, nel añu 2015, cuandu m’enteréi de la recuperación de la Danza, aiquí en Degaña.

Quería felicitar güei, a tous los mozos ya la xente que fixu posible, que despuéis de 55 añus, la Danza volviera a la fiesta ya a los corazones de tous los degañeses.

Hay reconocer tamién la inestimable ayuda, ya’l bon trabachu de Manuel Cerecedo, Lito, de Pranzáis, el tamboriteiru ya maestro de Danza, sin el que la recuperación de la Danza sería muitu más complicada, si non imposible.

Ya cumu non, reconocer ya felicitar a las mozas ya mucheres del ramu, que mantuvienun viva esta ancestral costumbre. Gracias Angelita de Caneiru, Marina de Calamín, ya toalas outras mozas del ramu.

Tengo que nombrar aiquí tamién a dalgunos degañeses que cunucí pol sou trabachu ya’l sou amor ya dedicación a Degaña ya a la tierra que nos víu nacer, xente qu’entiende que las raíces son las que nos alimentan, nos sofitan ya nos fain miedrar.

Falo de Milio ‘i Sebastián cuno sou blog “Camín Cimeiro”, de Iván Fernández nu sou trabachu cumo cineasta ya de Pedro Fernández, de casa Manulu ‘i Pedro, cunu sou tsibru Los surcos invisibles de las lágrimas.

Ya cun esto acabo, mios nenos, que nun quiero tenevos aiquí paraos, ya sei que tais esperando pola fiesta.

Gracias a Sergio de Calamín ya’l resto de la Comisión de Fiestas, por invítame a este actu.

Gracias a Mario Ancares, por méteme neste guapu emboláu.

Gracias a Jesús ya Joselu Álvarez, a Mari de Tanón ya Javier de Calamín,  a Juan Carlos ya Begoña (por esos Gin tonic tan especiales).

Gracias a tous, pola vuesa amistá, ya pola ayuda pa la redación del Tsibru de la Danza, ya un abrazu pa tous los degañeses.

Viva la Danza.

Viva Santiago ya viva Degaña.

Muitas Gracias.

 

 

                                                              Naciu ‘i Riguilón

                                  Degaña, 24 de Julio de 2022